ஆண்டாள் அருளிய திருப்பாவை
திருப்பாசுரம் - 16
 |
| மணிக்கதவம் தாள் திறவாய் |
கோயில் காப்பானே! கொடி தோன்றும் தோரண
வாயில் காப்பானே! மணிக்கதவம் தாள் திறவாய்!
ஆயர் சிறுமியரோமுக்கு அறைபறை
மாயன் மணிவண்ணன் நென்னலே வாய்நேர்ந்தான்
தூயோமாய் வந்தோம் துயிலெழப் பாடுவான்
வாயால் முன்ன முன்னம் மாற்றாதே அம்மா! நீ
நேய நிலைக்கதவம் நீக்கேலோர் எம்பாவாய்.
எங்களுக்குத் தலைவனாய் நின்று - எல்லாவித நலன்களையும் காத்து வரும் பெருந்தகையாளன் நந்தகோபனின் அரண்மனையைக் காப்பவர்களே!...
மங்கலக் கொடிகள் கட்டப்பட்டுள்ள தோரண வாயி்லைக் காப்பவர்களே!...
மணிக் கதவின் தாள் நீக்கித் திறந்து விடுங்கள்!
 |
| நென்னலே வாய் நேர்ந்தான் மணிவண்ணன் |
நாங்களும் - மார்கழி நீராடி புறத் தூய்மையுடனும், மாதவனைப் பாடி அகத் தூய்மையுடனும் வந்திருக்கின்றோம்!
நாங்கள் பெற்ற பெரும் பயனை அனைவரும் பெறும்படிக்கு - மற்றவரும் விழித்து எழ, பள்ளி எழுச்சி பாடி வந்திருக்கின்றோம்!
அம்மானே! ... முதன் முதலில் நோன்பு நோற்று எங்கள் நெஞ்சம் நிலைபெறும் வண்ணம் நெடுவாயில் தேடி வந்திருக்கின்றோம்! ... அதனை மறுத்து -
எங்கள் மனம் நோகும்படியாக ஏதேனும் சொல்லி விடாதீர்கள்!.
தயவு செய்து - தாள் நீக்கி, திருக்கதவினைத் திறந்தருளுங்கள்!...
 |
| நன்றி - ரதி, தேவி |
கருத்துகள் இல்லை:
கருத்துரையிடுக
கருத்துகள் Gmail பயனர்களுக்கு மட்டும்..