உயிரே உணவே 3

  

நாடும் வீடும்

நலம் பெற வேண்டும்

பகையும் பிணியும்

தொலைந்திட வேண்டும்..

***

இன்று

தை 21

ஞாயிற்றுக்கிழமை

பகுதி 1

பகுதி 2

பகுதி 3

தெளிவுடன் ஆயத்தம்

கீரை மற்றும் காய்களை நன்கு சுத்தம் செய்த பிறகே நறுக்க வேண்டும்.. 

துரு பிடிக்காத கத்தி சுத்தமான பலகை அல்லது அரிவாள் மனைகளைத் தான்  பயன்படுத்த வேண்டும்..

இன்றைய சூழலில் வெதுவெதுப்பான நீரில் - கல் உப்பைக் கரைத்து அதில் காய்களைக் கழுவி எடுப்பது நல்லது..

சமையலுக்கான பாத்திரங்களும் சமையலறையும் எப்போதும் தூய்மையாக இருப்பது அவசியம்..

சமைப்பதற்கு முன்பே செய்ய இருக்கும் சமையலைப் பற்றிய தெளிவு இருக்க வேண்டும்..

உணவுப் பொருட்களின் தன்மையை அனுசரித்து மூடி வைத்தோ திறந்தோ வேக வைப்பது நல்லது..

அதிக நேரம் வேக வைப்பதால் நுண்ணூட்டங்கள் அழிந்து விடும் என்பதையும் நினைவில் கொள்ள வேண்டும்..

சமைக்கும் போது கவனம் முழுதும் சமையலில் மட்டுமே இருக்க வேண்டும்..

பருப்பு வகைகளை நீரில் சற்று நேரம் ஊற வைத்த பின் சமைப்பது நல்லது..

ஓரளவுக்குப் புதிய  பசுமையான காய்களே  உகந்தவை..

வாடி வதங்கிய/ கெட்டுப் போன காய்கள் சமையலுக்கு ஏற்றவை அல்ல..

எப்போதும் மிதமான உஷ்ணத்தில் சமைப்பது சிறப்பு..

உணவுப் பொருட்கள் அடி பிடிப்பதோ கருகுவதோ கூடாது..

கருகித் தீய்ந்த உணவுகளை உண்ணாமல் ஒதுக்குவது நல்லது..

சமைத்தவுடன் உணவை சூடு குறையாதபடிக்கு வேறு பாத்திரங்களில் மாற்றிக் கொள்வதும் நல்லதே..

கால சூழ்நிலைகளை அனுசரித்து சமைத்த உணவுகளின் தன்மை கெடாதபடிக்கு பாதுகாப்புடன் வைத்துக் கொள்ள வேண்டும்..

கெட்டுப் போன உணவுகள் உண்பதற்கு ஏற்றவை அல்ல என்பதையும் மறத்தலாகாது..

தினமும் மஞ்சள் தூள் போட்டு பால் குடிப்பது நலம்.. 

டீ காஃபி கார்பனேட்டட் பானங்களைத் தவிர்க்கவும் அல்லது அளவுடன் அருந்தவும்..  

தினமும் காலையில ஒரு தம்ளர் சுடுதண்ணீரில் நெய் அரை ஸ்பூன் சேர்த்து குடிப்பது  நலம் என்றொரு கருத்து பரவி வருகின்றது.. 

இது சரி என்றும் தவறு என்றும் இருவேறு கருத்துகள்.. ஆக, இது அவரவர் விருப்பம்.. 

எனினும் மதிய உணவில் சிறிதளவு சுத்தமான பசு நெய் (கடை நெய் அல்ல) சேர்த்துக் கொள்வது நல்லது..

நெய்யில்லா உண்டி பாழ் - என்கின்றார் ஔவையார்..

கருணைக் கிழங்கு மட்டுமே உடலுக்கு நல்லது..

தவிர - வேறு கிழங்கு வகைகள் தேவை எனில் மட்டுமே  அளவுடன் உண்ணவும்..

முடிந்த அளவு சமையலுக்கு  செக்கில் ஆட்டிய எண்ணெய் மட்டுமே நேரில் பார்த்து வாங்கி உபயோகப்படுத்தவும்.   இந்துப்பு, கல் உப்பு  பயன் படுத்தவும்..  

நாற்பது வயதிற்கு உட்பட்டோர் மட்டுமே புளிப்புச் சுவை உண்ணவும்.. 

சிறுதானியங்கள் எவ்வளவு முக்கியமோ  அந்த அளவுக்கு

அரிசியும் முக்கியம்..

எளிதில் செரிமானம் ஆகும் உணவை  சாப்பிடுவதே நல்லது.. 

இரவு ஒன்பதரைக்குள் உறங்க முயற்சிக்கவும்.. நல்ல  தூக்கம் வரும்படிக்கு எளிய உணவுகளையே இரவில் உட்கொள்ளவும்.. 

பரோட்டா, எண்ணெய் பிரியாணி மாதிரியான லொட்டு லொசுக்கு கடினங்களைத் தவிர்ப்பது நலம்..

நள்ளிரவுக்கு முன்பாக தூங்கும் பழக்கம்  எனில் சரியாக தூக்கம் வராது.. இதனால் உடம்பில் உஷ்ணம்   அதிகரிக்கும்..  தேவையில்லாத மலச்சிக்கல்  ஏற்படும்.. 

அவ்வப்போது வெதுவெதுப்பான நீர் அருந்தவும்.. 

(தள புள என்று கொதித்து  ஆறிய நீர் பயனற்றது)

வயிற்றை சுத்தமாக வைத்துக் கொள்ளவும்.. 

மனசாட்சிக்கு விரோதமில்லாமல் நேர்மையான வாழ்க்கையில் பெரிய வியாதி என்று எதுவும் இல்லை..  

இறை பக்தியினால்

 நம்மை நாமே சரி செய்து கொள்ள  முடியும்..

 

மேலும் குறிப்புகள்

அவ்வப்போது

வெளிவர இருக்கின்றன..

நம்முடைய நலம்

நம்முடைய கையில்..

நாளும் வாழ்க

நன்றென வளர்க..

***