திருப்புகழ்

நாடும் வீடும்

நலம் பெற வேண்டும்

பகையும் பிணியும்

தொலைந்திட வேண்டும்..

***

இன்று

ஐப்பசி 24

வெள்ளிக்கிழமை

இன்று

பொதுத் திருப்புகழ்

-::-

அனைவரும் நோயின்றி வாழ்வதற்கு

இத்திருப்புகழ் வழியாக வேண்டிக் 

கொள்கின்றார் 

அருணகிரி நாதர்..

தானந் தனதன தானந் தனதன

தானந் தனதன ... தனதான

வாதந் தலைவலி சூலம் பெருவயி 

றாகும் பிணியிவை ... யணுகாதே

மாயம் பொதிதரு காயந் தனின்மிசை

வாழுங் கருவழி ... மருவாதே

ஓதம் பெறுகடல் மோதுந் திரையது

போலும் பிறவியி ... லுழலாதே

ஓதும் பலஅடி யாருங் கதிபெற

யானுன் கழலிணை ... பெறுவேனோ..

கீதம் புகழிசை நாதங் கனிவொடு

வேதங் கிளர்தர ... மொழிவார்தம்

கேடின் பெருவலி மாளும் படியவ

ரோடுங் கெழுமுத ... லுடையோனே

வேதந் தொழுதிரு மாலும் பிரமனு

மேவும் பதமுடை ... விறல்வீரா

மேல்வந் தெதிர்பொரு சூரன் பொடிபட 

வேல்கொண் டமர்செய்த ... பெருமாளே..

-: அருணகிரிநாதர் :-

 நன்றி கௌமாரம்

வாதம், தலைவலி, வயிற்று வலி (சூலை) 

மகோதரம்  (வயிற்றில் நீர் வீக்கம்) எனும்

நோய்களாகிய இவற்றில் எதுவும் 

என்னை அணுகாமல்

மாயையான உடல் கொண்டு 

வாழும்படியான கரு வழியில் 

மீண்டும் என்னைச் சேர்க்காமல்

பெருங்கடலில் மேன்மேலும்

வீசுகின்ற அலைகளைப் போல 

பல பிறப்புகளில்  கிடந்து உழலாமல்

உனது புகழைப் பாடும் பற்பல 

அடியார்களைப் போல் நானும்

நற்கதி அடையவதற்கு உனது

 திருவடிகளைப் பெறுவேனோ?..

இன்னிசை கீதமும், 

உன் புகழைப் பாடும் நாதமும், 

வேதங்கள் விளங்கும்படி 

அவற்றை ஓதுபவர்களை

ஊழ்வினை வருத்தாமல் அதனை அழித்து 

அவர்களோடு எப்போதும் உடனிருந்து காத்து 

நிற்கின்ற திருவருளை உடையவனே..

வேதங்கள் தொழுகின்ற

திருமாலும், பிரமனும்

போற்றுகின்ற திருவடிகளை உடைய 

வீரனே வெற்றி வடிவேலனே..

சினத்துடன் மேலெழுந்து வந்து 

போர் புரிந்த சூரன் பொடிப் பொடியாகிப் போகும்படி

போர் புரிந்த வேலாயுதப் பெருமாளே!..

**

 

முருகா முருகா..

முருகா முருகா..

ஓம் சிவாய 

 திருச்சிற்றம்பலம்

***