தஞ்சையம்பதி: குணம் போற்றி..

நாடும் வீடும்

நலம் பெற வேண்டும்

பகையும் பிணியும்

தொலைந்திட வேண்டும்..

***

இன்று

ஆவணி 16

சனிக்கிழமை

கோவர்த்தன மலையின் அடிவாரத்தில் பசுக்களும் கன்றுகளும் காளைகளும் மேய்ந்து கொண்டிருந்தன..

கண்ணன் தனது நண்பர்களுடன் ஆங்கு ஒரு நிழலில் விளையாடிக் கொண்டிருந்தான்..

அப்போது அங்கே திரண்டு வந்த ஆயர்கள் எதற்கோ ஆயத்தமாவதைக் கண்டு -

" என்ன செய்யப் போகின்றீர்கள்?.. " என்று, அவர்களிடம் வினவினான்..

" இன்னும் சில தினங்களில் இவ்விடத்தில் இந்திரனுக்கு வழிபாடு செய்ய இருக்கின்றோம்.. " - என்றனர் ஆயர்கள்..

' இது என்ன புதுமை!.. ' என்று கண்ணன் அதிசயிக்க,

மழைக்கு ஆதாரமானவன் வருணன்.. அவனுக்குத் தலைவன் இந்திரன். அதனால் தான் அவனை வழிபடுகின்றோம்!.. - என்று விளக்கமளித்தனர் ஆயர்கள்...

" நமக்கு பசுக்களே ஆதாரம்.. பசுக்களுக்கு இந்த மேய்ச்சல் நிலமும் கோவர்த்தன மலையும் தான் ஆதாரம்.. எனவே கோவர்த்தன மலையை வணங்குவதே சாலச் சிறந்தது!.. " - என்றான் கண்ணன்..

கண்ணனின் விளக்கத்தை ஏற்றுக் கொண்ட மக்கள் - அடுத்த சில நாட்களில் பசுக்களையும் கோவர்த்தன மலையையும் சிறப்பாக வணங்கி வழிபட்டனர்..

இதனைக் கண்ட தேவேந்திரன் கடும் கோபம் கொண்டான்.

ஆயர்களை அடக்குவதற்காக - வருணனை அழைத்து கோகுலத்தை மூழ்கடிக்கும்படி ஆணையிட்டான்..

அதன்படி கடும் மழை பெய்யத் தொடங்கியது..
பெருமழையுடன் இடியும் மின்னலும் சேர்ந்து கொண்டன.

இப்படி இரவும் - பகலுமாக ஏழு நாட்கள் கடும் மழை பெய்தது..

ஆயர்களும் பசுக்களும் தவிப்புக்குள்ளானார்கள்.

இது தேவேந்திரனின் செயலே - என்பதை உணர்ந்து கொண்ட கண்ணன் கோவர்த்தன மலையைப் பெயர்த்தெடுத்து குடையாகப் பிடித்து நின்றான்..

கோவர்த்தன மலையின் கீழ் - கன்றுகளும், பசுக்களும், கோகுலத்தோர் அனைவரும் தஞ்சம் அடைந்தனர்..

கண்ணனின் பேராற்றலைக் கண்டு அதிர்ந்த இந்திரன் கோகுலத்திற்கு வந்து கண்ணனைத் தொழுது வணங்கித் தனது பிழையை பொறுத்தருளும்படி கேட்டுக் கொண்டான்..

பசுக்களாகிய ஜீவாத்மாக்களை காத்தமையினால் கண்ணனுக்கு - கோவிந்தன் என்ற பெயரும் நிலைத்து விட்டது..