சொல்லரும்பு

நாடும் வீடும்

நலம் பெற வேண்டும்

பகையும் பிணியும்

தொலைந்திட வேண்டும்..

***

இன்று

ஆவணி 3

முதல் ஞாயிற்றுக்கிழமை

கண்ணெடுத்துப் பார்க்க வேண்டும் 

கைகொடுத்துக் காக்க வேண்டும்..

முன் நடக்கும் வேளையிலே அம்மா 

முந்தி வந்து வாழ்த்த வேண்டும்..

வேழவனும் அருகிருக்க 

வேலவனை அரவணைத்தாய்

வேம்புடைய ஐயனுக்கு அம்மா

உன்மடியில் இடம் கொடுத்தாய்..

சொல்லரும்பு சூட்டுதற்கு அம்மா 

சூட்சுமங்கள் சொல்ல வேண்டும்..

நல்லதொரு சொல்லெடுக்க அம்மா

நா நயங்கள் சேர்க்க வேண்டும்..

பெற்றெடுத்துப் பெயரும் வைத்தாய் 

அம்மா பேரழகாய் வளர்த்தெடுத்தாய்

உற்றதொரு அறிவுடனே அம்மா

உச்சந்தலை வகிடெடுத்தாய் 

ஊனோடு உயிராகி  உள்ளிருந்து 

மொழி கொடுத்தாய்.. அம்மா

பக்கத்திலே நீயிருந்து இந்தப் 

பாலகனை வளர்த்தெடுத்தாய்..

நான் நடக்கும் வழியினிலே

நல்ல மலர் பூத்திருக்க

பூத்திருக்கும் பூக்களையும்

எந்தன் விழி பார்த்திருக்க..

அம்மா நீ அருள்புரிவாய்

ஆதரித்து நலந்தருவாய்

வந்தாரும் வாழ்ந்தாரும்

வாழ்த்துகின்ற வடிவழகே..

வல்வினைகள் வருத்தாமல்

வந்தவழி செல்ல வேண்டும்..

வாசல்நடை தேடிவந்து அம்மா

நானும் உன்னைப் பாட வேண்டும்..

ஆயிரங்கண் உடையவளே

அருள்மாரி பொழிபவளே

அன்பு கொண்டு பாடுகின்றேன்..

ஆதரவில் வாழுகின்றேன்..

கேட்டதுவும் குறைவு என்றால்

தந்ததுவும் நிறைவு அன்றோ..

தாய் முகத்தில் தயவிருக்க

தாள்மலரைப் போற்றுகின்றேன்..

**

ஆடி அமாவாசையன்று

திரு ஐயாற்றில்

அப்பர் ஸ்வாமிகளுக்கு

கயிலாயத் திருக்காட்சி

காணொளியாளருக்கு நன்றி..

*

ஓம் சக்தி ஓம் 

சக்தி ஓம் சக்தி 

ஓம்

***