சிவ தரிசனம் 1

 

நாடும் வீடும்

நலம் பெற வேண்டும்

பகையும் பிணியும்

தொலைந்திட வேண்டும்..

***

ஸ்ரீ பிலவ வருடம் மாசி 17 ( மார்ச் 1) க்ருஷ்ணபட்ச சதுர்த்தசி செவ்வாய்க் கிழமையாகிய இன்று சகல சிவாலயங்களிலும் ஸ்ரீ மஹா சிவராத்திரி வைபவம்..

ஸ்ரீ கும்பேஸ்வரர்

இன்றைய இரவுப் பொழுதில் இருந்து நாளை சூர்யோதயம் வரை நான்கு காலங்களிலும் மங்கல  திரவியங்களுடன் சிவ லிங்கத்திற்கு அபிஷேக அலங்காரமும் மஹா ஆரத்தியும் நிகழ்வுறும்..

கும்பகோணம் சுவாமிமலைக்கு  அருகில் உள்ள திருவைகாவூர், இராமேஸ்வரம், ஸ்ரீ சைலம் இங்கெல்லாம் திருவிழாக்கள்..

இருப்பினும், நான்கு கால சிறப்பு வழிபாட்டிற்கென நான்கு திருத்தலங்கள் சொல்லப்படுகின்றன..

அவை -

முதல் காலத்தில் குடந்தை ஸ்ரீ நாகேஸ்வரன் திருக்கோயில்..

இரண்டாம் காலத்தில் திருநாகேஸ்வரம் ஸ்ரீ நாகேஸ்வரன் திருக்கோயில்..

மூன்றாம் காலத்தில் திருப்பாம்புரம் ஸ்ரீ சேஷபுரீஸ்வரர் திருக்கோயில்..

நான்காம் காலத்தில் நாகப்பட்டினம் ஸ்ரீ காயாரோகணேஸ்வரர் திருக்கோயில் - என்பன..

ஸ்ரீ தாயுமானஸ்வாமி

நாம் நமது சூழ்நிலையை அனுசரித்து அருகில் உள்ள சிவாலயத்தில் தரிசனம் செய்து எல்லா நலன்களையும் எய்துவோமாக..

இன்றைய பதிவில்

திருஞானசம்பந்தப் பெருமான் அருளிச் செய்த பஞ்சாக்கரத் திருப்பதிகம்..

மூன்றாம் திருமுறை

திருப்பதிக எண் - 22

துஞ்சலும் துஞ்சல் இலாத போழ்தினும்

நெஞ்சகம் நைந்து நினைமின் நாள்தொறும்

வஞ்சகமற்று அடி வாழ்த்த வந்த கூற்று

அஞ்ச  உதைத்தன அஞ்செ ழுத்துமே.. 3.022.1

ஸ்ரீ மீனாக்ஷி சுந்தரேஸ்வரர்

மந்திர நான்மறை யாகி வானவர்

சிந்தையுள் நின்றவர் தம்மை ஆள்வன

செந்தழ லோம்பிய செம்மை வேதியர்க்கு

அந்தியுள் மந்திரம் அஞ்செ ழுத்துமே.. 3.022.2

ஊனில் உயிர்ப்பை ஒடுக்கி ஒண்சுடர் 

ஞான விளக்கினை ஏற்றி நன்புலத்து

ஏனை வழிதிறந்து ஏத்து வார்க்கு இடர்

ஆன கெடுப்பன அஞ்செ ழுத்துமே.. 3.022.3

ஸ்ரீ தஞ்சபுரீஸ்வரர்

நல்லவர் தீயர் எனாது நச்சினர்

செல்லல் கெடச் சிவ முத்தி காட்டுவ

கொல்ல நமன் தமர் கொண்டு போமிடத்து

அல்லல் கெடுப்பன அஞ்செ ழுத்துமே.. 3.022.4

கொங்கலர் வன்மதன் வாளி ஐந்தகத்து

அங்குள பூதமும் அஞ்ச ஐம்பொழில்

தங்கர வின்படம் அஞ்சுந் தம்முடை

அங்கையில் ஐவிரல் அஞ்செ ழுத்துமே.. 3.022.5

ஸ்ரீ காளஹஸ்தீஸ்வரர்

தும்மல் இருமல் தொடர்ந்த போழ்தினும்

வெம்மை நரகம் விளைந்த போழ்தினும்

இம்மை வினை அடர்த்து எய்தும் போழ்தினும்

அம்மையி னுந்துணை அஞ்செ ழுத்துமே.. 3.022.6

வீடு பிறப்பை அறுத்து மெச்சினர்

பீடை கெடுப்பன பின்னை நாள்தொறும்

மாடு கொடுப்பன மன்னு மாநடம்

ஆடி உகப்பன அஞ்செ ழுத்துமே.. 3.022.7

வண்டம ரோதி மடந்தை பேணின

பண்டை இராவணன் பாடி உய்ந்தன

தொண்டர்கள் கொண்டு துதித்த பின் அவர்க்கு

அண்டம் அளிப்பன அஞ்செ ழுத்துமே.. 3.022.8

கார்வணன் நான்முகன் காணு தற்கொணாச்

சீர்வணச் சேவடி செவ்வி நாள்தொறும்

பேர்வணம் பேசிப் பிதற்றும் பித்தர்கட்கு

ஆர்வணம் ஆவன அஞ்செ ழுத்துமே.. 3.022.9

புத்தர் சமண்கழுக் கையர் பொய்கொளாச்

சித்தத் தவர்கள் தெளிந்து தேறின

வித்தக நீறணிவார் வினைப் பகைக்கு

அத்திரம் ஆவன அஞ்செ ழுத்துமே.. 3.022.10

ஸ்ரீ வீழிநாதர் - திருவீழிமிழலை

நற்றமிழ் ஞான சம்பந்தன் நான்மறை

கற்றவன் காழியர் மன்னன் உன்னிய

அற்றமில் மாலை ஈரைந்தும் அஞ்செழுத்து

உற்றன வல்லவர் உம்ப ராவரே.. 3.022.11

***

ஸ்ரீ பிரஹதீஸ்வரர்

எல்லாம் வல்ல எம்பெருமானின் திருவருளால்

அகிலம் முழுதிலும் அறம் ஓங்குக..

அன்பு ஓங்குக..

ஓம் நம சிவாய சிவாய நம ஓம்

***