ஓங்கி வரும் சரணத்திலே

இன்று கார்த்திகையின் முதல் நாள்..

நல்லோர் அனைவருக்கும் தெரியும் இன்றைய நாளின் சிறப்பு...

மானுடம் தாங்கி வந்த மகத்தான ஜோதி

மணிகண்டன் புகழ்ச் சேவடி மக்களைக் காக்கட்டும்...

தன்னை எதிர்த்தோரையும் இடர்ப்படுத்தியோரையும்

இன்முகத்துடன் அரவணைத்துக் கொண்டவன் மணிகண்டன்...

அல்லலுற்று அரற்றித் திரியும் உயிர்கட்கு

ஐயனாக அப்பனாக நிற்கின்ற அருட்செல்வன்..

மணிகண்டப் பெருமானின் திவ்ய சரித்திரத்துள்

மானுடம் காக்க வந்த திருக்குறளின் பாக்கள்

பலவற்றைக் காணலாம்!.. 

மணிகண்டன் வழி கொண்டு வையகம் வாழட்டும்...  

மணிகண்டன் வழி கண்டு வளமெலாம் சேரட்டும்...

நெஞ்சங் கவர்ந்த

இப்பாடலை இயற்றியவர் திரு K. சோமு..

இசை கூட்டிப் பாடியவர் திரு. K. வீரமணி..
*****

ஓங்கார நாதத்திலே ஓங்கி வரும் சரணத்திலே 

பாங்காகத் தோன்றிடுவான் பந்தளத்து சபரியப்பன்.. 

நீங்காத மனை செல்வம் நிலையான புகழ் தேகம் 

தாங்கி வரும் இருமுடிக்கு தக்கபடி தந்திடுவான்

ஓங்கார நாதத்திலே ஓங்கி வரும் சரணத்திலே 

பாங்காகத் தோன்றிடுவான் பந்தளத்து சபரியப்பன்..

 நெய் மணக்கும் மேனியப்பா நிம்மதிக்குத் தோணியப்பா

கை மணக்கும் வாய் மணக்கும் கனதனம் மணக்குமப்பா

உள்ளமே அவன் கோயில் கண்களே அவன் வாசல்

வள்ளல் மணிகண்டனப்பா.. வழிவேலன் தம்பியப்பா!...

ஓங்கார நாதத்திலே ஓங்கி வரும் சரணத்திலே 

பாங்காகத் தோன்றிடுவான் பந்தளத்து சபரியப்பன்..

கற்பூர ஜோதி மலை காந்த மலை சபரி மலை

நற்பதம் நாடி வரும் ஞானியர்தம் தியான மலை

பொற்பதம் மேடையிலே பூரணனின் காட்சியிலே

அற்புதங்கள் கோடியப்பா.. ஐயப்பா சரணம் அப்பா!..

ஐயப்பா சரணம் அப்பா!.. 

ஐயப்பா சரணம் அப்பா!..

இந்த இணைப்பில் பாடலைக் கேட்கலாம்..

ஸ்வாமியே சரணம் ஐயப்பா!..

ஃஃஃ