அங்கும் இங்கும்

கடந்த வியாழனன்று திருமயிலை தரிசனம்..

அன்றைக்குப் பிரதோஷம்.. எனவே திருக்கோயிலினுள் மக்கள் வெள்ளம்..

அங்கே எடுக்கப்பட்ட சில படங்கள்..

திருமயிலை தரிசனம் முடிந்தபின் அருகிலிருக்கும்அருள்மிகு முண்டகக் கண்ணியம்மன் திருக்கோயில்..

முண்டகம் எனில் தாமரை..
அன்னையில் விழிகள் தாமரைப் பூக்களை நிகர்த்தவை....

எனவே - முண்டகக்கண்ணி... தாமரை விழியாள்..

திருக்கோயிலை மிகவும் சுத்தமாக பராமரிக்கின்றார்கள்.. பார்க்கும் போதே மகிழ்ச்சியாக இருக்கின்றது..

தீர்த்தமும் திருச்சாம்பலும் வழங்கி அருளிய முண்டகக்கண்ணியம்மன்
உண்டு மகிழ்வதற்கு அன்னமும் பாலித்தாள்..

அன்னையின் விதானம்

கோடி கோடியாய் நலங்களை வாரி வழங்கியருளும்
முண்டகக்கண்ணி அம்மனுக்கு இங்கே ஓலைக் கூரையே விதானம்...

தொடர்ந்து -
அருள்மிகு கோலவிழி பத்ரகாளியம்மன் திருக்கோயில்..

இங்கும் தூய்மை அழகு ஆகியன பிரகாசித்தன..

திருக்கோயிலினுள் நுழைந்ததுமே - சர்க்கரைப் பொங்கல் பிரசாதம்..

அம்பிகைக்கு நிவேதனம் ஆகிய பொங்கல்..

உயிரினுள் கலந்து பரவியது - பொங்கலின் சுவை..

சென்னையில் சில தினங்கள் மட்டுமே..

அங்கே கண்ட காட்சிகள்..

எந்தக் கோணத்தில் இருந்து கொண்டு அவற்றைப் பற்றிச் சொல்வது!?..

வெயில் என்றாலும் மழை என்றாலும்
ஆயிரம் சிறகுகளுடன் அவரவரும் பறந்து கொண்டிருக்கின்றார்கள்..

இயந்திர வாழ்க்கை என்பார்கள்..

இயந்திரமும் நாமும் ஒன்றா!..

ஆனாலும்
இயந்திரமும் தோற்றுப் போகும்..

எதையெல்லாம் அடைந்திருக்கின்றார்கள்?..
அதற்கு விலையாக எதையெல்லாம் கொடுத்திருக்கின்றார்கள்?..

சென்னையிலிருந்த போது
வியாழக்கிழமை முன்னிரவுப் பொழுதில் பெய்த மழையால் மின்சாரம் துண்டிக்கப்பட்டது..

அதற்குப் பின் வெகு நேரத்திற்கு ஒவ்வொரு வீட்டிலும் முடங்கிப் போனது இயல்பு நிலை..

ஆனாலும் -

நாளைக் காலையில் சீக்கிரம் எழவேண்டும்.. என்ற சிந்தனையுடன்
அன்றைய பொழுது கடந்து செல்கின்றது...

மீண்டும் இனிய உதயம்..

சென்னைக்கு வாழ்த்து சொல்லியபடி
நமது பயணம் தஞ்சையை நோக்கித் தொடர்ந்தது..

வாழ்க நலம்!..

***