தஞ்சையம்பதி: கார்த்திகைத் திருநாள்

புதன், நவம்பர் 25, 2015

கார்த்திகைத் திருநாள்

அண்ணாமலை..

திருஅண்ணாமலை..

அக்னித் தலம்..

ஆதி அந்தம் அறிய ஒண்ணாத அற்புதத் தலம்..

நான்முகனுடனும் ஹரிபரந்தாமனுடனும் -
ஈசன் திருவிளையாடல் கொண்டு இலங்கும் திருத்தலம்..

அம்பிகைக்குத் தன் மேனியில் சரிபாதியினை - இறைவன் அருளிய திருத்தலம்..

எண்ணரும் சிறப்புகளை உடைய இத்திருத்தலத்தில் வெகுசிறப்புடன் நிகழ்வது திருக்கார்த்திகைத் திருவிழா..

தீபத் திருவிழாவிற்கு எத்தனையோ காரணங்கள் சொல்லப்படுகின்றன..

எப்படியிருப்பினும், தீபம் ஏற்றப்படுவது - ஒளியின் பொருட்டு!..

அதன்மூலம் வழியின் பொருட்டு!..

தீப ஒளியினால் - புற இருள் அகல்கின்றது..

அவ்வண்ணமாக - அகத்தில் ஒளி பெருக வேண்டும்..

இதுவே திருக்கார்த்திகை தீபம் ஏற்றுதலின் சிறப்பு..

கடந்த 16/11 அன்று, தங்கக் கொடிமரத்தில் திருக்கொடியேற்றத்துடன் திருவிழா தொடங்கியது..

நாளும் பஞ்ச மூர்த்திகள் திருக்கோலங்கொண்டு எழுந்தளினர்..

சிறப்பு நிகழ்வாக -
21/11 அன்று வெள்ளித் தேரோட்டமும் 22/11 அன்று மகாரதங்களின் பவனியும் நடைபெற்றது..

நேற்று அதிகாலை மூலவர் சந்நிதியில் மகாபரணி தீபம் ஏற்றப்பட்டது..

இன்று மாலை ஆறுமணியளவில் ஆண்டுக்கொருமுறை நிகழும் அற்புதமாக ஸ்ரீ அர்த்தநாரீஸ்வரர் கொடிமண்டபத்திற்கு எழுந்தருள்கின்றார்..

அவ்வேளையில், ஏக காலத்தில் -
கொடி மரத்தின் முன்னுள்ள அகண்டத்திலும் அண்ணாமலையின் சிகரத்திலும் திருக்கார்த்திகை தீபம் ஏற்றப்படுகின்றது..

இதையடுத்து, தங்க ரிஷப வாகனத்தில் -
ஸ்ரீ உண்ணாமுலை நாயகியும் ஸ்ரீ அண்ணாமலையாரும் எழுந்தருள்கின்றனர்..

வளைக்கை மடநல்லார் மாமயிலை வண்மருகில்
துளக்கில் கபாலீச்சரத்தான் தொல்கார்த்திகை நாள்
தளத்தேந்து இளமுலையார் தையலார் கொண்டாடும் விளக்கீடு!..

- காண வருவாய் பூம்பாவாய்!.. - என, திருமயிலையில் அருளுகின்றார் திருஞான சம்பந்தப்பெருமான்..

தீபமேற்றுதலும் அது கொண்டு ஈசனை வழிபடுதலும் பாரம்பர்ய நிகழ்வு..

அதன் பயன் - மனம் ஒன்றுபடுதல். ஒடுங்குதல்..

அதன் மூலம் அன்பு கொண்டு அகிலத்தின் சகல உயிர்களுக்கும் ஆதரவளித்தல்..

அதுவே பிறவிப் பயன்!..

அதனை எய்துதற்கே - ஆன்றோர்கள் வழிகாட்டுகின்றனர்..

வையம் தளியா வார்கடலே நெய்யாக

வெய்ய கதிரோன் விளக்காக - செய்ய

சுடராழியான் அடிக்கே சூட்டினேன் சொன்மாலை

இடராழி நீங்குகவே என்று!.. (2082)

- பொய்கையாழ்வார் -

அன்பே தகளியா ஆர்வமே நெய்யாக

இன்புருகு சிந்தை இடுதிரியா - நன்புருகி

ஞானச்சுடர் விளக்கு ஏற்றினேன் நாரணர்க்கு

ஞானத் தமிழ் புரிந்த நான்!.. (2182)

- பூதத்தாழ்வார் -

இல்லக விளக்கது இருள் கிடப்பது

சொல்லக விளக்கது சோதி உள்ளது

பல்லக விளக்கது பலரும் காண்பது

நல்லக விளக்கது நம சிவாயவே!..

- திருநாவுக்கரசர் -

இல்லத்திலும் உள்ளத்திலும்

விளக்கேற்றுவோம்!..

திருக்கார்த்திகைத் திருநாள் நல்வாழ்த்துகள்!..

ஓம் நம சிவாய சிவாய நம ஓம்

* * *

14 கருத்துகள்:

சாரதா சமையல்25 நவம்பர், 2015 09:38
தங்களுக்கும், குடும்பத்தினருக்கும் திருக்கார்த்திகை தீபத்திருநாள் வாழ்த்துக்கள் !!
பதிலளிநீக்கு
பதில்கள்
balaamagi25 நவம்பர், 2015 11:01
வாழ்த்துக்கள் முதலில்.
ஆஹா திருவண்ணாமலையா? நடக்கட்டும் நடக்கட்டும்,,,,,,,
விளக்கமும், படமும் அழகு, அருமை,
தொடருங்கள், அனைவருக்கும் வாழ்த்துக்கள்.
பதிலளிநீக்கு
பதில்கள்
மனோ சாமிநாதன்25 நவம்பர், 2015 12:20
பொய்கையாழ்வார், பூத்தாழ்வார் பாடல்களை ரொம்ப நாட்களுக்குப்பிறகு படிக்க நேர்ந்ததில் மகிழ்வாக இருந்தது. பகிர்விற்கு அன்பு நன்றி!!
பதிலளிநீக்கு
பதில்கள்
G.M Balasubramaniam25 நவம்பர், 2015 17:03
இதைப் படிக்கும் போது தொலைக்காட்சியில் நேரடி ஒளி பரப்பும் நிகழ்கிறது.
பதிலளிநீக்கு
பதில்கள்
KILLERGEE Devakottai25 நவம்பர், 2015 17:22
அன்பின் ஜி வணக்கம்
திருவண்ணாமலை தீபத்திருநாளைப் பற்றிய விளக்கவுரையும் அழகிய படங்களும் நன்று தங்களுக்கு கார்த்திகை திருநாள் வாழ்த்துகள் ஜி
பதிலளிநீக்கு
பதில்கள்
Thulasidharan V Thillaiakathu25 நவம்பர், 2015 19:15
நேரடியாக திருவண்ணாமலை தரிசனம் கிடைக்கவில்லை ஆனால் தங்களின் பதிவின் மூலம் அதுவும் கிடைத்துவிட்டது ஐயா. அருமை. அதுவும் இறுதியாகப் பாடலுடன் பதிவு ....தரிசித்தோம். கார்த்திகைத் திருநாள் வாழ்த்துகள்!
பதிலளிநீக்கு
பதில்கள்
yathavan64@gmail.com26 நவம்பர், 2015 22:44
முக்தி அளிக்கும் பக்தி பதிவு
திருக் கார்த்திகை தீபத் திருநாள்
நல்வாழ்த்துகள் அய்யா

நட்புடன்,
புதுவை வேலு
பதிலளிநீக்கு
பதில்கள்

கருத்துரையைச் சேர்

கருத்துகள் Gmail பயனர்களுக்கு மட்டும்..