மாதரசி யமுனாம்பாள்

யமுனாம்பாள்!..

மகாராணியாக இருந்தும் மக்களுடன் கலந்த மாதரசி!..

ஸ்ரீ யமுனாம்பாள்

பதினேழாம் நூற்றாண்டில் தஞ்சையை ஆட்சி செய்த - (இரண்டாம்) சரபோஜி மன்னரின் மனைவியார் தான் யமுனாம்பாள்!..

மகாராணியார் யமுனா பாய் என்றும் அறியப்படுபவர்..

இவருக்கு - குழந்தைப் பேறு வாய்க்கவில்லை..

இதனால் - மனம் வருந்திய மன்னர் - சமய வழிபாடுகளில் பரிகாரம் தேடினார்..

அந்த காலக்கட்டத்தில் - திருவிசைநல்லூர் ஸ்ரீதர ஐயாவாள் அவர்களின் அனுக்கிரஹம் வேண்டி அவரை நேரில் சென்று தரிசிக்கின்றார்..

கால சூழ்நிலைகள் கூடிவந்த வேளையில் காசியிலிருந்து சிவலிங்கம் கொணர்ந்து -

நீராடுமங்கலம் எனப்பட்ட ( இன்று - நீடாமங்கலம்) கிராமத்தில் ஸ்ரீவிசாலாட்சி சமேத காசி விஸ்வநாத ஸ்வாமிக்கு ஆலயம் ஒன்றை எழுப்புகின்றார்..

இந்த நீராடுமங்கலத்தில் தான் வெண்ணாற்றின் தென் கரையில் இருந்து பாமணி ஆறும் கோரை ஆறும் பிரிகின்றன.

இயற்கை எழிலும் பசுமை வளமும் நிறைந்த நீராடுமங்கலத்திலேயே - அரச மாளிகை எழுப்பி மகாராணி யமுனாம்பாளுடன் வசிக்கின்றார்.

மகாராணியாரின் மணிவயிறு வாய்க்கின்றது..

ஆனாலும் ஊழ்வினை எதிர்வந்து நிற்கின்றது..

பிரசவ வேளையில் - தாயையும் சேயையும் காக்க இயலாது தவிக்கின்றனர் - மருத்துவர்கள்..

வேதனையான அந்த சூழ்நிலையிலும் -

இனி இந்த மண்ணில் சுகப்பிரசவம் நிகழும். தாய் சேய் உயிரைக் காத்து நிற்பேன்.. அதோ அந்த மாமரத்தில் ஐக்கியமாகி மக்களுடன் மக்களாக காலங்களைக் கடந்தும் வாழ்ந்திருப்பேன்!..

- என்று உடனிருந்தவர்களுக்கு ஆறுதல் கூறியவராக - தன்னுயிர் நீத்தார்..

அரண்மனைத் தோட்டத்தின் மாமரத்தில் மகாராணியார் ஐக்கியமானார்.

அதன் பின் - அவரது நினைவு போற்றப்பட்டது..

அந்த மாமரம் பல்லாண்டுகளாக மக்களின் வழிபாட்டில் இருந்து வருகின்றது..

இன்னும் - இந்த மண்ணில் சுகப்பிரசவம் தான்..

யமுனாம்பாள் சுகப்பிரசவத்திற்கு துணை நிற்கின்றார்!.. -  என்பதால்
சமய வேறுபாடுகள் ஏதுமின்றி - யமுனாம்பாளை வேண்டிக் கொள்கின்றனர்.

யமுனாம்பாள் - அவர்களே தாயாக நின்று இந்த ஊர் பெண்களை பிரசவத்தின் போது காத்தருள்வதாக நம்பிக்கை..

நீடாமங்கலத்தின் எல்லையில் - 

பிரசவத்தின் போது துர்மரணம் நிகழ்வதில்லை..

விதி வலியது - என்று இருக்குமேயானால் - அது வேறெங்கோ நிகழ்கின்றது.

பிறந்த குழந்தைகளை - யமுனாம்பாள் சந்நிதியின் முன்னால் கிடத்தி -நேர்த்திக் கடன் செலுத்துகின்றனர்..

காலங்கள் மாறின..

மகாராணியாக இருந்தும் மக்களுடன் வாழ்ந்து தெய்வத்துடன் ஐக்கியமாகிய யமுனாம்பாளுக்கு கோயில் ஒன்று எழுப்பப்பட்டது.

பின்னாளில் வந்த மராட்டிய மன்னர்களுக்கு - வழிபடு தெய்வமானார் யமுனாம்பாள்.

ஸ்ரீ சந்தான ராமஸ்வாமி - நீடாமங்கலம்

சரபோஜி மன்னர் ராம நாம தீட்சை பெற்றிருந்தார் எனக்கொண்டு - 1761-ல் மன்னர் பிரதாப சிம்மன் - நீடாமங்கலத்தில் ஸ்ரீ சந்தான ராமஸ்வாமி திருக்கோயிலை எழுப்பினார்.

நீடாமங்கலத்தின் ஒரு பகுதி சர்வமான்யம் எனப்பட்டது.

பிரதாபசிம்மன் காலத்தில் தான் யமுனாம்பாள் புரம் என்று வழங்கப்பட்டதாக அறியமுடிகின்றது.

மராட்டிய மன்னர்களின் ஆட்சி காலத்தில் -
தஞ்சையிலிருந்து பட்டுக்கோட்டை வழியாக இராமேஸ்வரம் வரை அரசர் தங்கிச் செல்வதற்கான சத்திரங்கள் பலவும் எழுப்பப்பட்டன.

இராமேஸ்வரம் செல்லும் பொதுமக்களுக்கும் சத்திரங்கள் அமைக்கப்பட்டன.

அப்படி எழுப்பப்பட்ட - பொது சத்திரங்களுள் பலவும் சமூக விரோதிகளால் ஆக்ரமிப்பு செய்யப்பட்டன.. அழிக்கப்பட்டன.

ஒரத்தநாட்டிலும் நீடாமங்கலத்திலும் திருவையாற்றிலும் சில சத்திரங்கள் - காலத்தின் மீதமாக - இன்றும் இருக்கின்றன..

மிக அழகான சிற்ப வேலைகளுடன் கூடிய கருங்கல் மண்டபங்களாக அந்த சத்திரங்கள் விளங்குகின்றன.

சில காரணங்களுக்காக -  திருக்கோயில்களில் காணப்படும் மோக நிலைச் சிற்பங்கள் இந்த சத்திரத்தின் மண்டபங்களிலும் காணக் கிடைக்கின்றன.

சிற்பங்கள் என்றால் - அவை ஆறடி உயரத்தில் அமைந்தவை அல்ல!..

நுட்பமான வேலைப்பாடுகளுடன் கூடிய மண்டபத்தின் முகப்பில் - அடித்தளத்தில் - பத்ம வரிசைக்கு மேலாக - கிட்டத்தட்ட முக்கால் அடி உயரமுடையவை..

இவை - இல்லற நிலைகளைக் காட்டுவதால் - வெகுண்டெழுந்தனர் சிலர்!..

கையில் கிடைத்ததைக் கொண்டு சிற்பங்களைச் சிதைத்து விட்டனர்..

சிதைத்தவர்களுக்கு இல்லறம் பிடிக்காதோ - என்னவோ!?..

சிதைத்தவர்கள் - தங்கள் வம்சத்தைத் தழைக்கச் செய்யாமலேயே -

சிதைக்குப் போய்ச் சேர்ந்தார்களோ - என்னவோ!?..

இந்த சத்திரத்தில் முப்பது ஆண்டுகளுக்கு முன் பள்ளிக்கூடம் இயங்கி வந்தது. 

ஆனால் - இன்றைய நிலை என்னவென்று தெரியவில்லை..

நீடாமங்கலத்தின் கிழக்குப்பகுதியில் யமுனாம்பாள் கோயில் திகழ்கின்றது.

நெல் அளக்கும் படியினை ஏந்திய திருக்கோலத்தில் மாதரசி யமுனாம்பாளின் திருக்கோலம் திருக்கோயிலினுள் திகழ்கின்றது.

ஆனாலும் - 1972-ல் வீசிய பெரும் புயலில் மாமரம் சாய்ந்து விழுந்து - காலகதி அடைந்து விட்டது.

ஆயினும், நன்றி மறவாத மக்கள் -  மாமரத்தின் வேர்ப்பகுதியில் கவசம் இட்டு வழிபட்டு நிற்கின்றனர்.

வாரந்தோறும் வெள்ளிக்கிழமைகளில் விசேஷமாக இருக்கும்.. 

தை மாதத்தின் கடைசி வெள்ளிக்கிழமை - ஏக தின உற்சவமாக மிகச் சிறப்பாகக் கொண்டாடப்படுகின்றது.

தலை சாய்த்து உறங்கும் மண்ணில் - தாய் மடியாய் இருந்து மக்களைக் காப்பவர் மகாராணி யமுனாம்பாள்!..

என் பிள்ளைகள் இருவருமே - தாய்க்கு மிகுந்த வேதனையைக் கொடுத்துப் பிறந்தவர்கள்.. 

இரண்டாவது பிரசவத்தின் போது - ஏதாவது ஒரு உயிரைத் தான் காப்பாற்ற முடியும் என்று சொல்லி விட்டார்கள்!..

கலங்கித் தவித்த - அந்த வேளையில் சுகப் பிரசவத்திற்கு வழிகாட்டி -
எங்கள் கூடவே இருந்து காத்து ரட்க்ஷித்த தாய் - யமுனாம்பாள்!..

தஞ்சையிலிருந்து 30 கி.மீ., தொலைவிலுள்ளது - நீடாமங்கலம்.

இன்றைய - திருவாரூர் மாவட்டத்தின் முக்கிய ஊர்களுள் ஒன்று..

நீடாமங்கலம் - யமுனாம்பாள் புரம் எனவும் வழங்கப்பட்டது..

தஞ்சை - திருவாரூர் மாவட்டங்களில் யமுனாம்பாள் புரம் என வேறு ஊர் எதுவும் கிடையாது.

  

நீடாமங்கலத்திலுள்ள யமுனாம்பாள் சத்திரமும் - மீதமிருக்கும் சில சத்திரங்களும் தஞ்சை மாவட்டத்தில் மாவட்ட ஆட்சியரைத் தலைவராகக் கொண்டு இயங்கும் சத்திரம் நிர்வாகம் எனும் தனி அமைப்பின் கீழ் உள்ளன.

இன்றைய (3/ஜூலை) வலைச்சரத் தொகுப்பின் கடைசியில் -

நீடாமங்கலம் அருகே என்று குறிப்பிடப்பட்டு செய்தி ஒன்று சொல்லப் பட்டிருக்கின்றது..

பிழையான தகவல் கண்டு மனம் மிகவும் வாடியது.

அதன் விளைவே - இந்தப் பதிவு!..

வலைச்சரத்தின் செய்தித் தொகுப்பில் -

யார் இந்த யமுனாம்பாள் என்ற நூல் ஒன்று கிடைத்தது - என்றும்,
நீங்கள் நினைத்தது போலவே தான் - என்றும்,
யூகம் - என்றும் குறிக்கப்படுகின்றது.

அவர்களுக்குக் கிடைத்த நூல் என்ன சொல்கின்றதோ - எனக்குத் தெரியாது..

அந்த நூல் - என்ன வேண்டுமென்றாலும் சொல்லி விட்டுப் போகட்டும்!..

யமுனாம்பாள் மகாராணி.. மக்களால் வழிபடப்படும் மாதரசி!..

பதில் இடம் பெற்றுள்ள படங்கள் Facebook- ல் இருந்து பெறப்பட்டவை.

நீடாமங்கலத்தில் இருந்த காலத்தில் - பல இடங்களிலும் சுற்றித் திரிந்தாலும் படங்கள் எடுக்கத் தோன்றவில்லை..

இனி தாயகம் திரும்பும் வேளையில் -
தன்னைத் தரிசிக்கவும் ஏற்றமிகு செய்திகளை வழங்கவும் -
அன்னை யமுனாம்பாள் அருள் புரிவாராக!..

வானுறையும் தெய்வத்துள் வைக்கப்பட்டவர் 

மகாராணி யமுனாம்பாள்!.. 

பலநூறு குடும்பங்களைக் காத்து நிற்பவர்..

அகழ்வாரைத் தாங்கும் நிலம் போல

அனைவரையும் அவர் தாங்கி நிற்பார்!..

மாதரசி யமுனாம்பாள் மலரடிகள் போற்றி!..

திருச்சிற்றம்பலம்.. 

* * *