ஸ்ரீ வேங்கடேச சரணம் 1

நாடும் வீடும் நலம் பெற வேண்டும்..

பிணியும் பகையும் தொலைந்திட வேண்டும்..

ஆரணன் ஆதிகாரணன் புகழ்வான் பணிந்திடும் பரிபூரணன்

நாரணன் திருவடி பணிந்திடு நெஞ்சமே நலமெலாம் இங்கு நிறைவதற்கு..

***

இன்றைய பதிவில்

திருமங்கையாழ்வார் அருளிச் செய்த
பெரிய திருமொழி
முதற் பத்து - ஒன்பதாம் திருமொழி

தாயேதந்தை யென்றும் தாரமே கிளைமக்க ளென்றும்
நோயேபட் டொழிந்தேன் உன்னைக் காண்பதோர் ஆசையினால்
வேயேய் பூம்பொழில்சூழ் விரையார் திருவேங்கடவா
நாயேன் வந்தடைந்தேன் நல்கியா ளென்னைக் கொண்டருளே..{1028}

மானேய் கண்மடவார் மயக்கில்பட்டு மாநிலத்து
நானே நானாவித நரகம் புகும் பாவம் செய்தேன்
தேனேய் பூம்பொழில்சூழ் திருவேங்கடமாமலை என்
ஆனாய் வந்தடைந்தேன் அடியேனை ஆட்கொண்டருளே..{1029}

கொன்றேன் பல்லுயிரைக் குறிக்கோள் ஒன்றிலாமையினால்
என்றேனும் இரந்தார்க்கு இனிதாக உரைத்தறியேன்
குன்றேய் மேகமதிர் குளிர்மாமலை வேங்கடவா
அன்றே வந்தடைந்தேன் அடியேனை ஆட்கொண்டருளே..{1030}

குலந்தான் எத்தனையும் பிறந்தே இறந்தெய்த் தொழிந்தேன்
நலந்தான் ஒன்றுமிலேன் நல்லதோர் அறம் செய்துமிலேன்
நிலந்தோய் நீள்முகில்சேர் நெறியார்த் திருவேங்கடவா
அலந்தேன் வந்தடைந்தேன் அடியேனை ஆட்கொண்டருளே..{1031}

எப்பாவம் பலவும் இவையே செய்திளைத் தொழிந்தேன்
துப்பா நின்னடியே தொடர்ந்தேத்தவும் கிற்கின்றிலேன்
செப்பார் திண்வரைசூழ் திருவேங்கட மாமலை என்
அப்பா வந்தடைந்தேன் அடியேனை ஆட்கொண்டருளே..{1032}

மண்ணாய் நீரெரிகால் மஞ்சுலாவும் ஆகாசமுமாம்
புண்ணார் ஆக்கை தன்னுள் புலம்பித் தளர்ந்தெய்த் தொழிந்தேன்
விண்ணார் நீள்சிகர விரையார்த் திருவேங்கடவா
அண்ணா வந்தடைந்தேன் அடியேனை ஆட்கொண்டருளே..{1033}

தெரியேன் பாலகனாய்ப் பலதீமைகள் செய்துமிட்டேன்
பெரியேனாயினபின் பிறர்க்கே உழைத்து ஏழையானேன்
கரிசேர்ப் பூம்பொழில்சூழ் கனமாமலை வேங்கடவா
அரியே வந்தடைந்தேன் அடியேனை ஆட்கொண்டருளே..{1034}

நோற்றேன் பல்பிறவி உன்னைக் காண்பதோர் ஆசையினால்
ஏற்றேனிப் பிறப்பே இடருற்றனன் எம்பெருமான்
கோல்தேன் பாய்ந்தொழுகும் குளிர்சோலை சூழ்வேங்கடவா
ஆற்றேன் வந்தடைந்தேன் அடியேனை ஆட்கொண்டருளே..{1035}

பற்றேலொன்றும் இல்லேன் பாவமே செய்து பாவியானேன்
மற்றேலொன்று அறியேன் மாயனே எங்கள் மாதவனே
கல்தேன் பாய்ந்தொழுகும் கமலச்சுனை வேங்கடவா
 அற்றேன் வந்தடைந்தேன் அடியேனை ஆட்கொண்டருளே..{1036}

கண்ணாய் ஏழுலகுக்கு உயிராய வெங்கார் வண்ணனை
விண்ணோர் தாம்பரவும் பொழில் வேங்கட வேதியனை
திண்ணார் மாடங்கள் சூழ் திருமங்கை யர்க்கோன் கலியன்
பண்ணார் பாடல் பத்தும் பயில்வார்க்கில்லை பாவங்களே..{1037}
***

நன்றி - கேசவ் ஜி..

குறுகி வந்த கொடுங்கிருமியின் காரணத்தால்
திருமாமலையில் பக்தர்க்கு தரிசனம் நிறுத்தப்பட்டது
என்று அறிந்து நெஞ்சம் வருந்துகிறது..

ஆயிரமாயிரம் அன்பர்க்கு பசிப்பிணி தீர்த்த
அன்ன கூடமும் அடைக்கப்பட்டது தான் விதியோ!..

தாயினும் இனியாய் தலைவா இனிதாய் தயவுடையாய்
இன்னலும் தீராய் இமையவர் கோனே திருமாமலை தனை உடையவனே..

ஸ்ரீ பிரசன்ன வெங்கடேசப் பெருமாள்
தஞ்சாவூர் 

வந்தார்க்கு வளந்தரு வளர்திரு வேங்கடம் உடையவனே

அடையா நடையும் அடைபட்டதே அலந்தார் மனமும் உடைபட்டதே

எந்தாய் இறைவா இடர் களைவாய் வரும்பிணி தன்னைத் தீர்த்தருள்வாய்

கொடையாய்க் குளிர்விழி திறந்தருள்வாய் திருமாமலையை உடையவனே!..

ஓம் ஹரி ஓம்

நமோ நாராயணாய

ஃஃஃ